எதற்குப் பெற்றோம் இந்த சுதந்திரம்
நாம் பெற்ற ஆனந்த சுதந்திரத்திற்கு வயது 72. சுதந்திரம் பெற்ற பொழுது எனக்கு வயது பதினொன்று. நான் உயர்நிலைப் பள்ளி மாணவன். ‘வாராது போல் வந்த மாமணியாம் சுதந்திரத்தை‘ ஆடிப்பாடி வரவேற்றோம். ஆசிரியப் பெருமக்கள் சுதந்திரத்தின் அருமையையும் பெருமையையும் உரைத்தார்கள்; உணர்த்தினார்கள்.
சும்மா வரவில்லை சுதந்திரம். இதற்காக நமது தலைவர்களும், மக்களும் செய்த தியாகம் பெரிது; சொல்லில் அடங்காது. இருநூறு ஆண்டுகளாக ஆழக்கால் பதித்திருந்த ஆங்கிலேயர், இங்கிருந்து வெளியேறுவதைத் தவிர வேறு வழியில்லை என மூட்டையைக் கட்டிக் கொண்டு போனார்கள். 1947 ஆகஸ்டு 15 இல் நம்மை நாமே ஆளுகின்ற உரிமையை மீட்டெடுத்தது நீண்ட நெடிய வரலாறு.
